ابوس ايدك اخلعني
بهذه الجمله بدء احد العميل كلامه معي اثناء زيارته لمكتب المحاماه الخاص بي.
كتب : احمد عبد الرازق
*** قصة شاب اتي لمكتب محاميه وهو يتأفف ويقول * ابوس ايدك اخلعني* *
اليكم التفاصيل التي اتفقت انا وصاحب القصة علي نشرها لاخذ رأي القارئ وتوجيه النصح له.
ذات يوم وانا جالس بمكتبي واذ بالسكرتيرة تبلغني بحضور احد الموكلين وتستأذن لدخوله وكنت قد اوشكت علي انهاء المقابلة التي تسبقه فأذنت له بالدخول فدخل وجلس وكان يبدو عليه علامات التوتر والغضب الشديد فكان حواري معه كالاتي "عذرا سأسرد القصة باللغة العربيه العامية تسهيلا للقارئ "
- . مالك متضايق من ايه بس؟
= . ابوس ايدك اخلعني من مراتي
-. فتبسمت قائلا له .. ايه يا عم انت هتغير مفاهيم الدين والقانون من امتي الراجل هو اللي عايز يخلع زوجته انا بقالي 20 سنة محامي واول مرة تمر عليا حالة زي كدة لان الطبيعي ان الزوجة هي اللي بتيجي وعايزه وتخلع.
- . طب انا هحكيلك وانت دلني وشور عليا اعمل ايه.
= اتفضل يا سيدي احكي كلي اذان صاغية بس اهدي كدة عشان افهمك واشور عليك صح.
- ماشي . انا متجوز بقالي خمس سنين وبحب مراتي واعتقد انها هي كمان بتحبني وعايشين مبسوطين وربنا كرمنا بالذرية ولد عمره اربع سنوات وبنت ربنا يخليهملي عمرها سنتين . بس مراتي غيوره جدا وانا بشتغل مراقب جودة في احد المصانع وهي معاها ليسانس اداب قسم تاريخ ولكنها قاعدة في البيت مش بتشتغل.
وفي يوم من حوالي سنة شافت رسالة علي تليفوني من واحدة زميلة والرسالة كانت موضحة ان فيه بيني وبين صاحبة الرسالة علاقة ولكن مجرد علاقة كلامية فقط والله يا استاذ
= كلامية برضوا… قاصد اني اخرجه من حالته بفكوا يعني
- ايه يااستاذ انت هتعمل زيها ياباشا كلامية بس مفيش غير كدة . المهم حاولت محاولات مضنية اني افهمها ان مافيش حاجة .. حتي اقتنعت
- وبعدين
= بس المهم بعد الرسالة ده حياتي اتشقلبت يعني خصام بينا بيوصل لشهور علي الرغم من اني دائما كنت بحاول اراضيها
فقررت اني اكف عن ارضائها واتعامل بالمثل وبالفعل الطريقة جابت نتيجة ولكنها علي طول تفتش في تليفوني وده سبب المشاكل لان انا ليا اصدقاء وزملاء وزميلات في المصنع اللي انا شغال فيه
بدات هي تشتكيني لاشقائي بتغير معاملتي ليها وبعدين اتراضينا والدنيا مشيت تمام
ولكن دون معاشرة لانها قالت ليه انها تبغض هذا الامر واحترمت رغبتها حتي انها قالت لي ان هذا البغض للمعاشرة غصب عنها
انا طبعا زعلت في الاول وفكرت اني اطلقها او اتجوز عليها لكن ديما كان عندي امل انها تهدي وتصفي وترجع حياتنا تاني زي ما كانت
ولكن اصبحت الحياة بيننا في حالة لا مبالاة منها اولا ثم انا
يعني وصلتني لدرجة اني حسيت اني لو قولتلها اني هتجوز عليها ممكن توافق
واجي بعد كدة القيها راجعه تاني تقولي مين فلانة اللي معلقالك علي البوست كذا
افضل ابرر لها ان ده زميلة وتعليقها عادي يعني
لحد ما مرة بتكلم مع مديرة العاملين في المصنع في مسائل تخص الشغل تقوم خاطفة التليفون من ايدي وتفضل تقلب في الرسايل ونفس الموضوع ده اللي بيعمل بينا مشاكل
عشان كدة بقولك ابوس ايدك اخلعني
= يا ما ينفعش اللي انت بتقولوا ده ما تروح تطلقها لو انت عايز ايه اللي منعك… . بس انا شايف ان مفيش سبب لغضبك وزعلك ده روح اقعد معاها واتفقوا علي حاجة انكم تعيشوا لولادكم وتستهدوا بالله كدة وعموما ااذن لي انشر القصة واخد راي الناس
- معنديش مانع يمكن نلاقي حل مناسب
انتم بقي ايه رائيكم
…
إرسال تعليق